（我真係唔識起題，打打下都夜晚三點，又係Facebook status太長就搬嚟，多多指教）
近排真係係咁寫字，喺無得影相嘅環境下，（畢咗業先發現其實我真係幾鐘意做作品，嗚嗚，小妹網站傳送門：bonniecheng.com）我諗呢個係唯一令我可以stay sane嘅方法。亦都多謝Facebook比我stalk到唔少倡議寫粵語嘅人，令我拋開咗寫粵文就一定唔可以混集英文字詞嘅諗法，既然粵英夾雜係我地香港人表達自己諗法嘅方式，就一於係咁樣紀錄我地自己嘅諗法。
今日想講下多啲女人嘅topic。（因為啱先同室友講開呢個topic lol）我諗我係喺呢度，先會feel到「身為女人」嘅概念係點－唔係代表喺香港無呢一種想法，而係可能喺呢度先可以比較articulate到，喺一個社會入面身為女人係點樣。
高規格頭盔已上，我唔係女權分子，我唔係要為所有女權topic負責，就算係女權分子都唔需要好似superman咁著住條紅底褲周圍飛去拯救地球，我只係寫下字嘅姐。
就算我係喺中學嘅時候，從來都無咁強烈地覺得身為一個女性原來可以係咁大制限－當然，我會從joint school識落嘅男校男仔睇到，傳統男校嘅自由度永遠都係比傳統女校大好多－但呢個男女之別從來都無真係咁crazily bother過我，咁喺自身環境盡量做好啲，做返一個人嘅本份就可以－
但當我喺柏林，可能話喺網路上遇到唔少因為婚姻而移居嚟德國嘅香港女人嘅時候，喺住嘅土耳其區見到永遠都係女人推住BB車嘅moment嘅時候，身為女人嘅感覺就會比較強烈－代表住限制嘅感覺。
有好多人一諗起話「嫁過嚟嘅香港女人」（因為婚姻而移居好似聽落neutral 啲，係咪會變咗因女），好多Müller Schneider*就會諗起好多stereotype，尤其你見到好多香港女人無啦啦喺香港人group度好多德國surname，我第一個諗法係「點解呢班香港女人要轉名？」當然呢個都係帶judgy嘅諗法，我絕對唔否認我有架－
但當你慢慢了解到，原來因為喺呢度，let say你如果係一個阿媽，帶住兩個小朋友出境，呢度嘅入境處係會因為你同小朋友嘅姓唔同而問你好多野，而為咗少好多官僚上嘅麻煩，再加埋入鄉隨俗，好多香港女人都會就會改咗自己個姓，咁你可以會問，點解呢度係仲係咁傳統，香港都未洗改姓啦－就算法律上容許複姓（例如我嫁過姓Schneider就變成Cheng-Schneider)，但好多時都要女人改姓？（雖然呢個情況係慢慢有改善）仲未計通常喺呢度生小朋友，通常都係女人留喺屋企湊仔（德國／香港女人通用），即係如果你嚟到，你想追事業，但又要湊仔（呢度無四大長老），做家務（呢度無菲律賓印尼孟加拉外傭比你班mom同班sir差遣），仲可能要學德文，你又咁啱搬咗去一個唔太國際化嘅村落度，啲人可能會覺得你「亞洲女人都係貪錢貪visa先過嚟」，而你又唔係好識講德文去講你自己嘅移民故事，例如可能你本身喺香港高薪厚職，因為伴侣，又或者你只係想下一代有更好嘅環境，嚟到呢度重新開始；仲未計其實可能最後你婚姻破裂，你喺德國，又可能唔想帶你嗰個已經好適應德國環境嘅小朋友返香港，而人地叫你個名已經變成Frau Schneider－so on and so forth
只係想講，所謂「食洋腸」真係無平時啲人（或者係兒登仔）你諗到咁爽，你見到呢班人，不論男女，所謂移民外地，「你就爽皮啦」，其實打個game可以一樣咁難，生活上都係spawn 好多怪比你打，只係入咗唔同server打機，無話入咗德國ser啲怪會變咗史萊姆。lol anyway 可能而家嘅我，見到呢班Müller會比較empathetic 啲？
仲未計香港女人，已經係比較幸福啲，起碼通常都會識講流利英文，好努力搞掂埋個德文，本身有一技之長會有多返少少機會去做野。如果係Badestr**嗰頭住嘅女人，可能唔知點樣盲婚啞嫁拉丁字母都未識睇，由唔知邊條村落就嫁過德國，真係you can do your math how hard will it be for these women 啦－呢度啲比女人睇嘅家暴支援熱線，係寫德英阿拉伯土耳其俄文架（唔係話個個移民都會打女人，但係如果你見到係用咩語言去寫，就諗到邊一個migration background嘅人會比較多會遇到呢種問題）
－
跳返自身，我諗我從來都無咁強烈覺得，作為一個女人，真係好忙，首先已經就快廿六歲，啱先畢業，一定要脫離屋企，你要搵工，搵到嘅可能會想追下事業，儲下錢，雖然你無固定嘅伴侣，但係你都會諗，如果有都要係時候諗呢啲，過多排又高齡產婦，本身呢個age已經十萬樣野喺個腦度要做，但係作為一個女人，就係多咗生理時鐘呢一個概念，而呢個moment真係feel到個鐘tic得愈黎愈大聲－我已經去到一個moment諗過，就算我想有小朋友，不如好似呢度嘅Clevershuttel咁，basically就係如果你想搭的士，有人同你同行，大家就可以share返的士嘅費用，如果我屋企家姐想有小朋友／朋友想有小朋友，就好似carsharing咁幫手share下啲cost，集中資源，幾個供一個咁樣比較化算，當然呢個只係一個想法，搞掂自己先講啦，而搞掂自己一part已經係我諗嚟緊呢兩年嚟最大嘅課題。獨立呀嗎，呢幾排成日都咁講架啦～
雖然我無諗過要成為咩藝術家，但如果拎返自身呢行嚟講，如果身為一個女性藝術家，gallery會驚你無啦啦去咗生仔要停產artwork－所以即係話如果你要發展你嘅藝術事業，你基本上都可以唔洗諗生仔，同埋你可以睇下M+係得幾少女性藝術家嘅作品，despite香港咁多藝術系嘅grad都係女人就明，作為一個女人你永遠都係有犧性，但係如果一個男人有小朋友，係唔會需要有呢個犧牲。
喺政圈context，係無人會質疑男政客「咁你個小朋友係邊個湊？」就好似蔡英文大選之前有藍營啲人攻擊佢，無小朋友嘅人點會明白育兒policy；但當如果蔡英文有小朋友，佢地同樣都可以話「你有小朋友點解你唔係喺屋企」男左女右，but women are always never right. (lol)
去到一個位，我記得近排同朋友都有講過呢個topic，佢講到真係好難怪有時啲女人真係會變成怪獸，太林善，唔harsh唔惡，就會比人話你無工作能力。回想起以前嗰一班變哂癡線女人嘅女老師，你作為一個女學生點都係鐘意同男人相處，因為佢地總係會chill好多，少好多無謂嘅 management of how you should behave as a woman，而可能班女人知道，呢個世界佢唔harsh你，迫你去either變成一個職場上好強嘅女人，或者係變成一個超守婦道嘅女人去嫁人，你嘅生活就會好困難，當然，無必要係either or 嘅，但係諗下佢地可能由細就係比人壓迫成咁嘅樣，喺佢地認知嘅pattern只有呢種玩法先可以生存，所以套返落去下一代度應該都大約會work－
我當然都係好討厭咁樣嘅教育模式，但係梳理清楚點解佢地會咁樣，都係改善問題嘅第一步嚟嘅。如果個社會對女人empathetic啲，有多啲支援，in general empathetic啲，例如話如果產假嚟講，如果全世界都好似瑞典咁，女人生仔，男人強制留喺屋企幫手湊，就無咗一種「你係女人要喺屋企湊仔所以你唔會有咁多機會as 一個男人」女人都可以發展佢嘅事業，而想湊仔嘅男人都有機會多啲時間同機會去享受湊仔嘅樂趣，and more importantly 責任啦。
而作為女人，係唔應該拎住支槍喺度互「fair」其他女人「點解你轉咗surname」「點解你唔生仔」「點解你咁咁咁」嘅lol 應該拎住支槍去「fair」班官，「fair」個社會？例如話點解出入境同仔女唔同姓嘅要咁麻煩for instance
註一：德國常見姓氏，就好似姓陳姓黃咁
註二：Badestr 係我住嘅土耳其人區最旺嗰條街
註三：我打完成篇發現我一隻粗口字都無用過，睇嚟我講正經野真係可以好正經wow
註四：收尾好似有啲草草了事feel，人生
